free web hosting | free website | Business Hosting | Free Website Submission | shopping cart | php hosting

 VEPSÄN ÜLÄOPENIKAD PITERIŠ 

    Venän Valdk. Pedagogižes Universitetas Piteriš om vepsän üläopenikoid Piterin agjaspäi, kudambad opendase erazvuiččil tedokundoil. No hö voiba opemaha meiden kel't oficialižikš vaiše Pohjoižen Rahvahiden Institutas. Ezmäižel kursal – viž üläopenikad, tožel – mugažo viž, koumanden – nell', nelländen kursan – koume; kaks' heišpäi – nored mehed i üks' – neižne. Vepsän kelen opendajin radaba Igor' Brodski da Sergei Miznikov, lujas tutab kelentedaimez'.

    Tetpas, üläopenikoil ei olend hüväd paginpraktikad, sikš miše  heiden vanhembad ei pagiškoi heidenke vepsän kelel. Pidab sanuda, miše heiden paginvaihišt-ki om lujas goll', no üks-se üläopenikoiden hüvä openduz täutab meid optimizmal.

    Openduzkabinetas om erazvuiččid kirjoid vepsän kirjankelel, i nene kirjad, kut "Kodima"-lehtesen nomerad-ki kaiken ottas radho. Üläopenikad saba tedoid kut kirjankeles, muga vepsän tahopaginoiš-ki, hö lugeba äjan vepsäks. Mö-ki, opendajad, sädam uzid openduzmaterialoid, programid i m. e.

    Tedokund varastab uzid abiturientoid vepsän külišpäi, i meiden Sebr voib rekomenduida heid opendamižen täht da abutada heile udes lidnalaižes elos i openduses. Ku kelle-ni noriš vepsläižišpäi tegeb mel' tulda opendamhas Piterhe, ka kelotagha meile. Meiden kontakttelefon: (812)3563196, e-mail: kodima@mail.ru

I. Brodski                

   Tehnologian da Dizainan Universitetas Piteriš opendase sur' grupp vepsläižid üläopenikoid Karjalaspäi – Petroskoišpäi, Vepsän Rahvahaližes Makundaspäi i toižiš necen valdkundan tahoišpäi. Erased heišpäi tuleskeleba vepsän kelen urokoile Pedagogižehe Universitetha, i nece openduz om ani maksutoi. Meiden Sebr ühtes Karjalan Rahvahaližen Politikan Laudkundanke tegeb kaik, miše nene-ki üläopenikad openuižiba meiden kel't.

TAGAZE