|
"Vepsän literatur internetas"
N. Abramov
Runod
Elegia - Kibu - Jevdokija - L. J. - Pihl' - Kodite - Keväz' tuli
Pigai langetas sügüzen kuldad,
Pihlän lämoin-ki sambutab vihm...
Minä lidnha en rigehti tulda,
Kuti kaskeses tabazi rihm.
Lujas čoma om kävelta hillei,
Lehtid pakuižid mujeleb keng.
Vaiše lämoiš jo sambudas hiled,
Vaiše rindhiš jo vilumb om heng.
Kulen taivhalpäi komedad kidad,
Letas kurged... vai joucniden än'...
Mehil keskes möst torad i ridad,
Kuti armastuzkuna-se män'.
Sobad taciba habad i koivud,
Vaiše lämemba sobihe kuz'...
Toižed azjad i erased toivod,
Uded tahtoindad, armastuz uz'.
Järves tünikas kül'besoi sorzad,
Kahten ujudas... čukoišoi möst.
Ken-se pöl'göiti... Löutas-ik ozad?
Mi heid varastab pimedas ös?
Armhan kadotab ambundas pahas,
Üksnäz kevädel pördase sorz...
Vaiše minä en tule jo tagaz,
Pörte en, a ni-konz, a ni-konz...
1998
Lujas vähä taivast,
vaiše seinäd oma,
Jose pandud maha,
jose venun kaumas?
Uned nägen pahad,
kuti mindai taptas,
Tedan, aig om tulnu -
veičel soned čapta.
Kuverz' igad anttud -
tedab vaiše Jumal,
Lujas kibu paha
lähteškab konz humal.
Vaiše tuleb vägi,
unohtase kibu,
Feniks-lindun kartte
tuhkaspäi mä libun...
Minun rinhad kuti
rebiteldas künded,
Räkas higos nouzen,
sil'miš seištas kündled.
Jose aig om kolda,
en ole völ ravaz...
Midä minun polhe
johtutaškab rahvaz?
Elin elon sel'ktän,
elin konz i mustan,
Vaiše - tunden kodin,
kazvatajid muštan...
Uskon - tuleb vägi,
unohtase kibu,
Feniks-lindun kartte
tuhkaspäi mä libun.
1998
Sinä
oled kaikiš edemb,
Sinä
oled kaikiš lähemb...
Kuti
čomid pajoid enamb,
Kuti
hubid päivid vähemb.
Segoin
minä elonkor'bes,
Midä
tehta, kuna astta?...
Sinun
tehut tuli vastha,
Kuti
amu konz-se nores.
Kuti
sügüz'sä sä – pimed,
Kuti
tal'ven lumi – vauged.
Kaikiš
paremb, armaz nimi,
Vaiše
mägi – lujas korged.
Süvä
järv, vai madal jogi?
Keväz'mec,
vai sügüz'lehted?
Tariž
astta kuna jaugei,
Avoi
kebnei venhut tehta?..
Seižub
mägel korged pedai,
Libun,
kacun, otan pähä...
Oled
sinä kaikiš edemb?
Oled
sinä kaikiš lähemb?...
1992
Linneb sinuta pal'l'az kaik ma,
Linneb sinuta kuiv meiden mec.
Kaika linneškab vihmakaz sä,
Minä tegemoi hubakaz mez'.
Lindud letasoi meriden taga,
Vaiše kevädel ei tulgoi tagaz.
Koivuil vihandad langetas lehted.
Lindäs änikod ahavol resttud.
Linneb sinunke täuz' meiden ma,
Linneb terveh i nor' meiden mec.
Tun' i päivokaz tegese sä,
Minä en huba linneškan mez'.
Tagaz kevädel tuldasoi lindud,
Pahad živatad keratas künded.
Kazdas koivuile vihandad lehted,
Sinei änikoid äi linneb resttet!
sulaku 92
Midä seižud jogen päl
Pal'hal jaugal, pal'hal päl?
Rusttad marjad kandad mest,
Kacub sinun päle mec.
Kuti neižne, sinä bask,
Kazvad čomas mustas mas,
Rindal nägub reboin händ,
Letas kurged ülähän.
Mäneb sügüz', tuleb tal'v,
Lankteb sinun vihand pal't.
Ahav alastoman löb,
Pühut rusttad marjad söb.
1988
(mest = möst)
Minä pahan lidnan jätin,
Kodimale ajan mest...
Sel'ged vezi meiden järviš,
Vihand jogen taga mec.
Minun sizar - kor'bes kägi,
Keväz'mecoi - minun vel'l'...
Kaikiš korktemb - meiden mägi,
Kaikiš paremb - meiden kel'.
Muren' mašin, astun jaugei,
Mel', sä kod'he mindai ve...
Kaikiš pit'kemb - meiden jogi,
Kaikiš armhemb - kodite!
Keväz' tuli, keväz' tuli!
Ojad jokstas, lumi suli.
Mi ol' vauged, nügüd' - vihand,
Mäčhu pöudol vätas prihad.
Keväz' tuli, keväz' tuli,
Koivunveden mujan hulil.
Keväz'vihmal holed pezi,
Joges lämšuškandeb vezi.
Keväz' tuli, keväz' tuli!
Mecoin änen korv jo kuli.
Täudub änil lindun peza,
Lähen om jo - armaz keza!
2000
2003